8.98.1
इन्द्रा॑य॒ साम॑ गायत॒ विप्रा॑य बृह॒ते बृ॒हत् | ध॒र्म॒कृते॑ विप॒श्चिते॑ पन॒स्यवे॑ ||
Rigveda 8.98
१२ नृमेध आङ्गिरस: । इन्द्र: । उष्णिक् ; ७, १०-११ ककुप् ; ९,१२ पुरउष्णिक् ।
8.98.1
इन्द्रा॑य॒ साम॑ गायत॒ विप्रा॑य बृह॒ते बृ॒हत् | ध॒र्म॒कृते॑ विप॒श्चिते॑ पन॒स्यवे॑ ||
1 / 1
Scroll wheel or ↑ ↓ keys move between shlokas · swipe on touch
Source text
Complete verse transcript
Source: DharmicData Sanskrit; Griffith English via rigveda-online (public domain)
This reader preserves the available Sanskrit and attributed translation. A modern interpretation is shown only when reviewed text exists in the source record.
8.98.2
त्वमि॑न्द्राभि॒भूर॑सि॒ त्वं सूर्य॑मरोचयः | वि॒श्वक॑र्मा वि॒श्वदे॑वो म॒हाँ अ॑सि ||
8.98.3
वि॒भ्राज॒ञ्ज्योति॑षा॒ स्व१रग॑च्छो रोच॒नं दि॒वः | दे॒वास्त॑ इन्द्र स॒ख्याय॑ येमिरे ||
8.98.4
एन्द्र॑ नो गधि प्रि॒यः स॑त्रा॒जिदगो॑ह्यः | गि॒रिर्न वि॒श्वत॑स्पृ॒थुः पति॑र्दि॒वः ||
8.98.5
अ॒भि हि स॑त्य सोमपा उ॒भे ब॒भूथ॒ रोद॑सी | इन्द्रासि॑ सुन्व॒तो वृ॒धः पति॑र्दि॒वः ||
8.98.6
त्वं हि शश्व॑तीना॒मिन्द्र॑ द॒र्ता पु॒रामसि॑ | ह॒न्ता दस्यो॒र्मनो॑र्वृ॒धः पति॑र्दि॒वः ||
8.98.7
अधा॒ ही॑न्द्र गिर्वण॒ उप॑ त्वा॒ कामा॑न्म॒हः स॑सृ॒ज्महे॑ | उ॒देव॒ यन्त॑ उ॒दभि॑: ||
8.98.8
वार्ण त्वा॑ य॒व्याभि॒र्वर्ध॑न्ति शूर॒ ब्रह्मा॑णि | वा॒वृ॒ध्वांसं॑ चिदद्रिवो दि॒वेदि॑वे ||
8.98.9
यु॒ञ्जन्ति॒ हरी॑ इषि॒रस्य॒ गाथ॑यो॒रौ रथ॑ उ॒रुयु॑गे | इ॒न्द्र॒वाहा॑ वचो॒युजा॑ ||
8.98.10
त्वं न॑ इ॒न्द्रा भ॑रँ॒ ओजो॑ नृ॒म्णं श॑तक्रतो विचर्षणे | आ वी॒रं पृ॑तना॒षह॑म् ||
8.98.11
त्वं हि न॑: पि॒ता व॑सो॒ त्वं मा॒ता श॑तक्रतो ब॒भूवि॑थ | अधा॑ ते सु॒म्नमी॑महे ||
8.98.12
त्वां शु॑ष्मिन्पुरुहूत वाज॒यन्त॒मुप॑ ब्रुवे शतक्रतो | स नो॑ रास्व सु॒वीर्य॑म् ||