8.102.1
त्वम॑ग्ने बृ॒हद्वयो॒ दधा॑सि देव दा॒शुषे॑ | क॒विर्गृ॒हप॑ति॒र्युवा॑ ||
Rigveda 8.102
२२ भार्गव: प्रयोग:, अग्निर्बार्हस्पत्य:, पावको वा, सहस: पुत्रौ गृहपति-यविष्ठौ तयोर्वान्यतर: । अग्नि: । गायत्री ।
8.102.1
त्वम॑ग्ने बृ॒हद्वयो॒ दधा॑सि देव दा॒शुषे॑ | क॒विर्गृ॒हप॑ति॒र्युवा॑ ||
1 / 1
Scroll wheel or ↑ ↓ keys move between shlokas · swipe on touch
Source text
Complete verse transcript
Source: DharmicData Sanskrit; Griffith English via rigveda-online (public domain)
This reader preserves the available Sanskrit and attributed translation. A modern interpretation is shown only when reviewed text exists in the source record.
8.102.2
स न॒ ईळा॑नया स॒ह दे॒वाँ अ॑ग्ने दुव॒स्युवा॑ | चि॒किद्वि॑भान॒वा व॑ह ||
8.102.3
त्वया॑ ह स्विद्यु॒जा व॒यं चोदि॑ष्ठेन यविष्ठ्य | अ॒भि ष्मो॒ वाज॑सातये ||
8.102.4
औ॒र्व॒भृ॒गु॒वच्छुचि॑मप्नवान॒वदा हु॑वे | अ॒ग्निं स॑मु॒द्रवा॑ससम् ||
8.102.5
हु॒वे वात॑स्वनं क॒विं प॒र्जन्य॑क्रन्द्यं॒ सह॑: | अ॒ग्निं स॑मु॒द्रवा॑ससम् ||
8.102.6
आ स॒वं स॑वि॒तुर्य॑था॒ भग॑स्येव भु॒जिं हु॑वे | अ॒ग्निं स॑मु॒द्रवा॑ससम् ||
8.102.7
अ॒ग्निं वो॑ वृ॒धन्त॑मध्व॒राणां॑ पुरू॒तम॑म् | अच्छा॒ नप्त्रे॒ सह॑स्वते ||
8.102.8
अ॒यं यथा॑ न आ॒भुव॒त्त्वष्टा॑ रू॒पेव॒ तक्ष्या॑ | अ॒स्य क्रत्वा॒ यश॑स्वतः ||
8.102.9
अ॒यं विश्वा॑ अ॒भि श्रियो॒ऽग्निर्दे॒वेषु॑ पत्यते | आ वाजै॒रुप॑ नो गमत् ||
8.102.10
विश्वे॑षामि॒ह स्तु॑हि॒ होतॄ॑णां य॒शस्त॑मम् | अ॒ग्निं य॒ज्ञेषु॑ पू॒र्व्यम् ||
8.102.11
शी॒रं पा॑व॒कशो॑चिषं॒ ज्येष्ठो॒ यो दमे॒ष्वा | दी॒दाय॑ दीर्घ॒श्रुत्त॑मः ||
8.102.12
तमर्व॑न्तं॒ न सा॑न॒सिं गृ॑णी॒हि वि॑प्र शु॒ष्मिण॑म् | मि॒त्रं न या॑त॒यज्ज॑नम् ||
8.102.13
उप॑ त्वा जा॒मयो॒ गिरो॒ देदि॑शतीर्हवि॒ष्कृत॑: | वा॒योरनी॑के अस्थिरन् ||
8.102.14
यस्य॑ त्रि॒धात्ववृ॑तं ब॒र्हिस्त॒स्थावसं॑दिनम् | आप॑श्चि॒न्नि द॑धा प॒दम् ||
8.102.15
प॒दं दे॒वस्य॑ मी॒ळ्हुषोऽना॑धृष्टाभिरू॒तिभि॑: | भ॒द्रा सूर्य॑ इवोप॒दृक् ||
8.102.16
अग्ने॑ घृ॒तस्य॑ धी॒तिभि॑स्तेपा॒नो दे॑व शो॒चिषा॑ | आ दे॒वान्व॑क्षि॒ यक्षि॑ च ||
8.102.17
तं त्वा॑जनन्त मा॒तर॑: क॒विं दे॒वासो॑ अङ्गिरः | ह॒व्य॒वाह॒मम॑र्त्यम् ||
8.102.18
प्रचे॑तसं त्वा क॒वेऽग्ने॑ दू॒तं वरे॑ण्यम् | ह॒व्य॒वाहं॒ नि षे॑दिरे ||
8.102.19
न॒हि मे॒ अस्त्यघ्न्या॒ न स्वधि॑ति॒र्वन॑न्वति | अथै॑ता॒दृग्भ॑रामि ते ||
8.102.20
यद॑ग्ने॒ कानि॒ कानि॑ चि॒दा ते॒ दारू॑णि द॒ध्मसि॑ | ता जु॑षस्व यविष्ठ्य ||
8.102.21
यदत्त्यु॑प॒जिह्वि॑का॒ यद्व॒म्रो अ॑ति॒सर्प॑ति | सर्वं॒ तद॑स्तु ते घृ॒तम् ||
8.102.22
अ॒ग्निमिन्धा॑नो॒ मन॑सा॒ धियं॑ सचेत॒ मर्त्य॑: | अ॒ग्निमी॑धे वि॒वस्व॑भिः ||