20.62.1
व॒यमु॒ त्वाम॑पूर्व्य स्थू॒रं न कच्चि॒द् भर॑न्तोऽव॒स्यवः॑ | वाजे॑ चि॒त्रं ह॑वामहे ||
Atharvaveda 20.62
Sukta 62
20.62.1
व॒यमु॒ त्वाम॑पूर्व्य स्थू॒रं न कच्चि॒द् भर॑न्तोऽव॒स्यवः॑ | वाजे॑ चि॒त्रं ह॑वामहे ||
1 / 1
Scroll wheel or ↑ ↓ keys move between shlokas · swipe on touch
Source text
Complete verse transcript
Source: DharmicData / AtharvaVeda (Sanskrit text)
This reader preserves the available Sanskrit and attributed translation. A modern interpretation is shown only when reviewed text exists in the source record.
20.62.2
उप॑ त्वा॒ कर्म॑न्नू॒तये॑ स नो॒ युवो॒ग्रश्च॑क्राम॒ यो धृ॒षत् | त्वामिद्ध्य॑वि॒तारं॑ ववृ॒महे॒ सखा॑य इन्द्र सान॒सिम् ||
20.62.3
यो न॑ इ॒दमि॑दं पु॒रा प्र वस्य॑ आनि॒नाय॒ तमु॑ व स्तुषे | सखा॑य॒ इन्द्र॑मू॒तये॑ ||
20.62.4
हर्य॑श्वं॒ सत्प॑तिं चर्षणी॒सहं॒ स हि ष्मा॒ यो अम॑न्दत | आ तु नः॒ स व॑यति॒ गव्य॒मश्व्यं॑ स्तो॒तृभ्यो॑ म॒घवा॑ श॒तम् ||
20.62.5
इन्द्रा॑य॒ साम॑ गायत॒ विप्रा॑य बृह॒ते बृ॒हत् | ध॒र्म॒कृते॑ विप॒श्चिते॑ पन॒स्यवे॑ ||
20.62.6
त्वमि॑न्द्राभि॒भूर॑सि॒ त्वं सूर्य॑मरोचयः | वि॒श्वक॑र्मा वि॒श्वदे॑वो म॒हाँ अ॑सि ||
20.62.7
वि॒भ्राजं॒ ज्योति॑षा॒ स्व॑१रग॑च्छो रोच॒नं दि॒वः | दे॒वास्त॑ इन्द्र स॒ख्याय॑ येमिरे ||
20.62.8
तम्व॒भि प्र गा॑यत पुरुहू॒तं पु॑रुष्टु॒तम् | इन्द्रं॑ गी॒र्भिस्त॑वि॒षमा वि॑वासत ||
20.62.9
यस्य॑ द्वि॒बर्ह॑सो बृ॒हत् सहो॑ दा॒धार॒ रोद॑सी | गि॒रींरज्रां॑ अ॒पः स्वऽर्वृषत्व॒ना ||
20.62.10
स रा॑जसि पुरुष्टुतं॒ एको॑ वृ॒त्राणि॑ जिघ्नसे | इन्द्र॒ जैत्रा॑ श्रव॒स्याऽ च॒ यन्त॑वे ||